Përmendorja e Andon Llazov-Qosetos është vendosur mbrëmë në rreth rrotullimin në afërsi të hotelit “Kontinental” në Shkup.

Kryetarja e Qytetit të Shkupit, Danella Arsovska përmes një postimi në Fejsbuk shkruan se:

“Me vendosjen e këtij monumenti në nder të revolucionarit maqedonas Andon Llazov Janev-Qoseto nderojmë shpirtin e tij të palodhur dhe sakrificën në luftën për një Maqedoni të lirë dhe të pavarur. Andon Llazov Qoseto i njohur për shpirtin e tij luftarak, është simbol i historisë maqedonase dhe një nga pjesëmarrësit e shquar në Kryengritjen e Ilindenit. Roli i tij në lëvizjen revolucionare është me rëndësi të paçmuar për lirinë dhe pavarësinë e sotme të vendit tonë”, shkruan Arsovska.

Për kthimin e përmendores së Qoseto, mëngjesin e sotëm përmes një komunikate të shkurtër ka informuar edhe Qyteti i Shkupit. Në kumtesë madje përcillet publikimi në Fejsbuk i Arsovskës, pa detaje.

Përmendorja e Andon Lazov-Qoseto më parë u vendos tek Kompleksi i gjykatave në vitin 2014 kur Koce Trajanovski ishte kryetar i Qytetit të Shkupit. Pasardhësi i tij, Peter Shilegov e largoi atë në vitin 2018 me shpjegimin se ka qenë ndërtim pa leje.