shtë shpallur konkursi për zgjedhjen e kreut të ri të Antikorrupsionit. Kandidatët kanë afat 10 ditor për të dorëzuar biografitë e tyre pranë Komisionit për Selektim në Kuvend, i cili pas intervistave do t’ia dorëzojë listën kandidatëve Komisionit për Zgjedhje dhe Emërime. Kryetarja e deritanishme, Tatjana Dimitrovska, dha dorëheqje më 25 korrik, pasi Prokuroria ngriti dy akuza kundër saj në rastin “Aditivët”.

“Kuvendi sot shpalli konkurs për zgjedhjen e kreut të ri të Antikorrupsionit. Afati për aplikim për këtë pozitë është dhjetë ditë, ndërsa fazat e mëtejshme të procedurës janë të përcaktuara në Ligjin për Parandalimin e Korrupsionit dhe Konfliktit të Interesave”, raporton Mihaillo Donev, gazetar.

Në ditët në vijim do të dihen emrat e kandidatëve që do të konkurrojnë për zëvendësimin e ish-kryetares së Antikorrupsionit, Tatjana Dimitrovska, e cila dha dorëheqje pasi Prokuroria për Ndjekjen e Krimit të Organizuar dhe Korrupsionit ngriti aktakuzë kundër saj për dy vepra penale në kuadër të rastit “Aditivët”. Pas shpalljes së konkursit, Kuvendi tani duhet të formojë komision për seleksionimin e kandidatëve që do të verifikojë biografitë e aplikuesve dhe brenda pesë ditëve nga publikimi i listës do të organizojë intervista me ata që i plotësojnë kushtet. Brenda tre ditëve nga realizimit të intervistës, komisioni për seleksionim përgatit listë të kandidatëve dhe e dorëzon te Komisioni parlamentar për Zgjedhje dhe Emërime, i cili brenda dy ditëve i propozon Kuvendit kandidatët më të mirë të renditur, me arsyetim të veçantë për secilin kandidat të propozuar. Ndërkohë, derisa të përfundojnë këto procedura dhe të zgjidhet kryetari i ri, Antikorrupsionin e udhëheq nënkryetarja Biljana Karakashova Shulev. Ish-kryetarja e Antikorrupsionit, Tatjana Dimitrovska, dorëzoi dorëheqjen më 25 korrik pas presionit të madh në opinion, pasi ndaj saj u ngritën akuza për dy vepra penale – “zbulim i sekretit zyrtar” për ish-drejtorin e TEC Negotinës, Nebojsha Stojanovski, i cili gjithashtu është i akuzuar në rastin “Aditivët”, si dhe për veprën “falsifikim kompjuterik”, pasi një revizor nga Enti Shtetëror i Revizionit në emrin e saj e ka kaluar testin për certifikatë të sekretit shtetëror. Dimitrovska nuk ka shkuar në punë që nga fundi i prillit deri në dorëheqjen e saj, por ka marrë pagë, pasi prokurori në rastin “Aditivët” kërkoi, ndërsa gjykata e miratoi ndalimin e çdo kontakt me dosjet dhe kolegët. /Alsat.mk