Google ka njoftuar për një shkelje sigurie që ka rezultuar me qasje të paautorizuar në të dhënat personale të përdoruesve, raportojnë mediat ndërkombëtare. Gjiganti teknologjik me seli në Mountain View, Kaliforni, ka zbuluar se hakerët kanë arritur të aksesojnë informacione sensitive të përdoruesve.

Përveç kësaj, Google ka paralajmëruar për një mashtrim të ri ku persona keqdashës shtiren si mbështetje teknike e kompanisë për të vjedhur të dhëna personale ose financiare. Sipas raportimeve të “Columbus Dispatch”, këto sulme synojnë të mashtrojnë përdoruesit për të marrë qasje në llogaritë e tyre.

Për të mbrojtur 2,5 miliardë përdoruesit e Gmail, Google këshillon përditësimin e menjëhershëm të fjalëkalimeve dhe forcimin e masave të sigurisë.

Si të mbroheni nga mashtrimet?

Sipas blogut të sigurisë kibernetike Malwarebytes Labs, mashtruesit dërgojnë email-e që pretendojnë se llogaria juaj është në rrezik, duke ju nxitur të ndryshoni fjalëkalimin përmes një lidhjeje të rreme. Kjo u mundëson hakerëve të marrin kontrollin e llogarisë suaj.

Google thekson se nuk dërgon kurrë email-e që kërkojnë fjalëkalime ose të dhëna personale. Për të shmangur mashtrimet e phishing, kompania ofron këto këshilla:

• Raportoni email-et e dyshimta te Qendra e Ndihmës së Google.
• Mos i besoni mesazheve që kërkojnë informacione personale përmes email-it, SMS-ve ose telefonatave.
• Shmangni futjen e fjalëkalimit pas klikimit të lidhjeve në mesazhe të dyshimta.
• Kini kujdes nga mesazhet që krijojnë ndjenjë urgjence.
• Mos klikoni lidhje nga burime të panjohura ose të paverifikuara.