Mbrëmë në hapjen e shtabit të Këshillit Vendor “Teli”, kandidati i Besëlidhjes Aleanca Kombëtare për Integrim për kryetar të Komunës së Çairit, Bujar Osmani, bashkë me kandidatin e AKI për kryetar të Qytetit të Shkupit, Zejd Rexhepi, bartësin e listës për këshilltar në Qytetin e Shkupit, Abdulselam Selami dhe kryetarin e degës së BDI-së në Çair, Bekim Neziri, theksoi se Çairi ka nevojë për vizion dhe disiplinë pune.

“Besimi që më keni dhënë më obligon të punoj ditë e natë për një Çair modern, të pastër dhe transparent. Këto zgjedhje janë referendum për dinjitetin tonë – të kthejmë tapinë e shtëpisë dhe të bëhemi zot shtëpie në komunën tonë,” tha Osmani.

Ai shtoi se, ndryshe nga komunat si Gazi Baba që nuk kanë plan urbanistik që nga viti 1995, Çairi do të ketë një plan të qartë për zhvillim urbanistik, me vizion afatshkurtër dhe afatgjatë për 1, 5 dhe 10 vitet e ardhshme.