Kalaja e Kaninës në Vlorë po i nënshtrohet një procesi të kujdesshëm restaurimi dhe konservimi për ta ruajtur, forcuar dhe për ta bërë më të aksesueshme për vizitorët.

Ministri i Ekonomisë, Kulturës dhe Inovacionit, Blendi Gonxhja ndau sot pamje nga punimet në këtë kala, teksa theksoi se, ky projekt, i financuar nga Banka Botërore, vjen si bashkëpunim mes MEKI, FSHZH-së dhe Bashkisë Vlorë.

Ai shtoi se projekti është hartuar nga ProSkene dhe Trashëgimia Kulturore pa Kufij – CHwB Albania, duke ndërthurur ekspertizën shkencore, arkitektonike dhe kulturore në shërbim të trashëgimisë sonë.

Punimet, që po realizohen përfshijnë konsolidimin e strukturave, ndërhyrje restauruese e konservuese, si dhe elementë rijetësues që pasurojnë përvojën e vizitorëve, theksoi Gonxhja.

Ministri nënvizoi se, Kalaja e Kaninës së shpejti do të shndërrohet në një atraksion kulturor e turistik, në shërbim të identitetit historik dhe zhvillimit të qëndrueshëm të zonës.