Më 9 shtator 1946 në Postribë u organizua kryengritja e parë antikomuniste në vend.

Në monumentin e Kryengritjes së Postribës, u vendosën sot kurora me lule dhe u mbajt një ceremoni me përfaqësues nga bashkia e Shkodrës.

Kryetari i bashkisë Shkodër, Benet Beci vlerësoi popullin e kësaj zone, të cilin e cilësoi si gjithmonë liridashës dhe mbrojtës i parimeve të demokracisë dhe zhvillimit.

Kryengritja e Postribës është një nga lëvizjet e para të armatosura antikomuniste.

Elita e qytetit të Shkodrës, antikomunistët e vërtetë dhe nacionalistët nga fshatrat e Shkodrës morën pjesë në këtë lëvizje që ka vlera të mëdha në planin lokal, kombëtar, politik dhe gjeopolitik. Kryengritja e Postribës kishte premisat strategjike për t’u shtrirë si kryengritje e përgjithshme.

Një grup rreth 200 vetash të drejtuar nga Jub Kazazi dhe Osman Haxhia, sulmuan kazermat ushtarake dhe ndërtesat qeveritare, por pa sukses. Pas shtypjes së kryengritjes nisën edhe proceset ndëshkimore gjyqësore të shkëputura nga njëra-tjetra, për shkak të numrit të madh të të akuzuarve. Në gjyqet e para përveç se të dyshuarve si kryengritës, u nxorën edhe një numër të madh klerikësh dhe intelektualësh të Shkodrës.