Një botë e shkatërruar nga 56 konflikte, numri më i lartë që nga fundi i Luftës së Dytë Botërore. Një sistem i paaftë për të ndaluar luftërat. Dhe një OKB që nuk është më në gjendje të përmbushë misionin për të cilin u themelua në vitin 1945, tha kryeministrja italiane Giorgia Meloni, në fjalimin në Asamblenë e Përgjithshme të OKB-së, në Nju Jork.

Meloni paralajmëroi për rreziqet e një bote gjithnjë e më të paqëndrueshme.

“Po jetojmë në një periudhë historike të përshpejtuar dhe komplekse, me mundësi të mëdha, por të mbushura me rreziqe. A kemi arritur të garantojmë paqen? Përgjigja është e pamëshirshme. Paqja, dialogu dhe diplomacia nuk janë më në gjendje të bindin dhe të fitojnë”, tha ajo.

Në fjalimin e saj 16-minutësh – dje në mbrëmje, në një sallë gjysmë të zbrazët – Meloni përmendi gjithashtu fjalët e Papa Françeskut për “një luftë të tretë botërore të zhvilluar pjesë-pjesë”, duke iu referuar Ukrainës dhe Gazës si pikat më shqetësuese të konfliktit.

Kryeministrja italiane akuzoi Rusisnë për shkelje të Nenit 2 të Kartës së OKB-së dhe refuzim të çdo negociate, duke i shkaktuar “një plagë të thellë të drejtës ndërkombëtare”.

Kritika e saj ndaj Izraelit nuk ishte më pak e ashpër.

“Përgjigja duhet të respektojë parimin e proporcionalitetit, dhe Izraeli e ka tejkaluar kufirin, duke shkelur normat humanitare dhe duke shkaktuar një masakër ndaj civilëve”, tha Meloni.

“Ky qëndrim, do ta shtyjë Italinë të mbështesë disa nga sanksionet e propozuara nga Bashkimi Evropian kundër qeverisë së Netanyahut, por jo njohjen e shtetit palestinez nga Italia”, tha ajo.

Lidhur me të ardhmen e konfliktit izraelito-palestinez, Meloni përsëriti qëndrimin historik të Italisë: respektimin e “Deklaratës së Nju Jorkut” në favor të zgjidhjes me dy shtete dhe kundërshtimin ndaj vendbanimeve të reja në Bregun Perëndimor.

Gjithashtu, kryeministrja italiane theksoi dy kushte thelbësore për njohjen e shtetit palestinez: “Lirimin e të gjithë pengjeve dhe përjashtimin e Hamasit nga rolet qeveritare”.