Sulmuesi anglez i Bayern Munich, i njohur me nofkën ‘Uragani’ Harry Kane po vazhdon të lërë gjurmë në Gjermani.

Reprezentuesi i Anglisë, me dy golat e shënuar ndaj Werder Bremenit, ka hyrë në historinë e futbollit evropian. Kane është lojtari i parë që ka arritur kuotën e 100 golave me një klub të pesë ligave kryesore të kontinentit, vetëm pas 104 ndeshjeve.

Për krahasim, Cristiano Ronaldos me Real Madridin iu deshën 105 takime për të arritur këtë shifër, po aq sa edhe Erling Haaland për Manchester Cityn.

Në javët e fundit, mediat britanike dhe ato gjermane kanë raportuar për një klauzolë në kontratën e Kane me Bayern Munihun, e cila teorikisht do t’i lejonte atij rikthimin në Premier League në vitin e katërt, për një shumë prej 65 milionë eurosh. Megjithatë, vetë lojtari duket se e ka mbyllur këtë kapitull.

“Rekordi i Alan Shearer në Premier League nuk është më në mendimet e mia. Kur u largova nga Anglia mendova se një ditë do të rikthehesha për ta thyer, por që prej momentit që mbërrita në Mynih po shijoj çdo moment këtu”, ka deklaruar Kane pas fitores ndaj Werder Bremenit.