Dueli mes Serbisë dhe Shqipërisë është konsideruar si një ndeshje me rrezikshmëri të lartë dhe për këtë arsye do të merren masa të rrepta sigurie.

Ky është përfundimi i mbledhjes së përbashkët mes Federatës Serbe të Futbollit, FIFA-s dhe Ministrisë së Punëve të Brendshme.

Përmes një komunikate për shtyp, Federata Serbe njofton se FIFA ka marrë vendimin që për sfidën e Leskovacit të dërgojë dy oficerë sigurie, me qëllim sigurimin maksimal të sigurisë për të gjithë pjesëmarrësit dhe tifozët.

Prania e tyre tregon qartë rëndësinë dhe seriozitetin e kësaj ndeshjeje për aspektin e sigurisë, por edhe nënvizon detyrën e të gjithë aktorëve që sporti të vihet në vendin e parë,” thuhet në njoftim.

Por Federata Serbe nuk ndalet vetëm këtu. Ajo kujton vetë ngjarjet e Beogradit më 14 tetor të vitit 2014, duke dashur që të ndërgjegjësojë tifozët e saj që të sillen në mënyrë të civilizuar.

“Ndeshja e kaluar, kur Serbia ishte pritëse e Shqipërisë, u ndërpre për shkak të incidenteve. Fitorja iu dha Shqipërisë në tavolinë dhe ne u ndëshkuam me heqjen e tre pikëve,” thuhet në komunikatë.

Federata Serbe njoftoi gjithashtu se është duke ndërmarrë të gjitha masat e nevojshme që ndeshja e ardhshme të zhvillohet në atmosferë respekti dhe fair play.