Në veprën më lart piktori Agron Polovina sjell një pamje romantike të Aulonës antike– emri i lashtë i Vlorës, përmes ngjyrave të buta dhe arkitekturës karakteristike mesdhetare.

Piktura, e ekspozuar në koloninë artistike "Art Vlora" të këtij viti, rikthen atmosferën e qytetit bregdetar në kohët e hershme.

Agron Polovina i përket grupit të piktorëve shqiptarë të formuar në Akademinë Shqiptare të Arteve, në Tiranë, në atelienë e grafikës (1983). Ai ka drejtuar më parë Galerinë e Arteve Edward Lear, Departamentin e Grafikës së Liceut Artistik dhe Drejtorinë e Kulturës, Rinisë dhe Sportit të Bashkisë, të gjitha në Berat. 

Tablotë e Polovinës kanë ritëm dhe magji, ato karakterizohen nga një dizonancë koloristike ekspresive. Aftësia për të gjetur dhe paraqitur imazhet e figurave legjendare, jetën e përditshme të qytetit, lojës gjithmonë e më misterioze të harmonisë së ngjyrave, është prirja e përditshme në krijimtarinë e artistit. 

Piktori qëndron shpesh mbi një “urë” të ndërtuar prej tij prej 10 vjetësh, ndërmjet abstraktes dhe reales, në raportin ndërmjet imazhit e hijes dhe paraqitjes së figurës në tri përmasa. Duke qëndruar në këtë “urë” Polovina me kujdes vëzhgon prurjet e fantazisë së tij dhe realizon veprat, duke mbajtur një ekuilibër të brishtë ndërmjet ekspresionizmit dhe abstraksionit, dadaizmit dhe realizmit; duke respektuar trashëgiminë e artistëve të traditës. /liberale/