Ish-ministri i Punëve të Jashtme dhe kandidati aktual për Komunën e Çairit, Bujar Osmani, ka lëshuar akuza të rënda ndaj qeverisë aktuale gjatë intervistës së tij në emisionin “Top Story”. Si nënkryetar i BDI-së, Osmani deklaroi se Marrëveshja e Ohrit është anuluar tërësisht, ndërsa sipas tij, Qeveria e Mickoskit po zhvillon një agresion të hapur kundër barazisë dhe statusit shtetformues të shqiptarëve në Maqedoninë e Veriut.

“Nëse e keni dëgjuar kryeministrin, ai vetë ka thënë se roli i këtyre zgjedhjeve është të zhdukim BDI-në nga skena politike. Që nga dita e parë e kanë filluar luftën kundër Maqedonisë së Ohrit – po luftojnë gjithçka që ka të bëjë me trashëgiminë e Marrëveshjes së Ohrit”, deklaroi Osmani, përcjell PressOnline.al

Sipas tij, qeveria aktuale ka zhbërë tre shtyllat kryesore të Marrëveshjes së Ohrit, duke përfshirë përdorimin e gjuhës shqipe, përfaqësimin e drejtë në institucione dhe balancuesin etnik.

“Sot gjuha shqipe nuk është më në institucione. E kanë instrumentalizuar Gjykatën Kushtetuese për të anuluar ligjet që kanë dalë nga Marrëveshja e Ohrit. Kanë përjashtuar shqiptarët nga institucionet dhe presin të përfundojnë zgjedhjet për ta anuluar edhe gjuhën shqipe,” shtoi Osmani, përcjell PressOnline.al

Ai theksoi se qëllimi i fushatës kundër BDI-së është të ndërpritet çdo lidhje e shqiptarëve me trashëgiminë e UÇK-së dhe Marrëveshjes së Ohrit, të cilat, sipas tij, përbëjnë krenarinë e popullit shqiptar dhe bazën e barazisë në vend.

“Po ndodh një agresion total ndaj Maqedonisë së Ohrit, ndaj konceptit të barazisë dhe ndaj statusit shtetformues të shqiptarëve,” përfundoi Osmani.