Aleanca Kombëtare për Integrim ka reaguar ashpër ndaj veprimeve të koalicionit VLEN, të cilin e akuzon për bashkëpunim të hapur me VMRO-DPMNE-në në prag të zgjedhjeve lokale në Komunën e Butelit.

“Sot, derisa të gjithë shqiptarët janë bashkuar rreth një kandidati të vetëm dhe po punojnë me përkushtim për fitoren historike në Butel, zyrtarët e VLEN-it po bëjnë fushatë për VMRO-në dhe për kryetarin aktual nga kjo parti”, thuhet në reagimin e AKI-së, ndërsa kanë publikuar fotografi ku shihet kryetari i Alternativës, Zeqirija Ibrahimi dhe zëvendësministrja e Transportit, Kaltrina Zekolli të shoqëruar me kryeministrin Mickoski dhe Darko Kostovskin duke shëtit në Butel.

Sipas AKI, gjatë një tubimi të mbajtur në fshatin Luboten, ku morën pjesë lideri i VMRO-së Hristijan Mickoski, kandidati i kësaj partie Darko Aleksovski dhe funksionarë të tjerë, zyrtarët e VLEN-it “kanë dalë në krah të kundërshtarëve politikë të shqiptarëve”.

“Në vend që të jenë në shërbim të interesit të shqiptarëve, zyrtarët e VLEN-it lavdërojnë kandidatin e Mickoskit para qytetarëve të Lubotenit dhe Butelit, duke dëshmuar vasalitet të plotë ndaj padronëve të tyre politikë”, theksohet në komunikatë.

AKI kujton se edhe kandidati i VLEN-it për Butel që u refuzua nga Komisioni Shtetëror i Zgjedhjeve dhe nuk arriti të shkaktojë përçarje ditën e votimit, sot bashkë me kryetarin e partisë bën fushatë për VMRO-në në Butel.

“Tani, i bashkuar me krerët e partisë, po i shërben Mickoskit dhe VMRO-së, duke tradhtuar çdo parim kombëtar dhe moral”, shton më tej reagimi.

AKI thekson se “etja e tyre për pushtet i ka bërë të harrojnë edhe fjalët e veta për masakrën e Lubotenit dhe lotët e krokodilit për martirët dhe dëshmorët e asaj ngjarjeje”.

“Vasaliteti i tyre kalon çdo kufi të turpit dhe mjerimit. Kjo tradhti duhet të shërbejë si kushtrim për të gjithë shqiptarët që të mobilizohen edhe më shumë për fitoren historike në Butel”, përfundon reagimi i Aleancës Kombëtare për Integrim.