Një hap historik për teknologjinë dhe ekonominë indiane: Google do të investojë 15 miliardë dollarë në Andhra Pradesh për të ngritur një kompleks gjigant qendrash të dhënash të inteligjencës artificiale në qytetin portual të Visakhapatnam.

Sipas marrëveshjes së nënshkruar sot në New Delhi, ky projekt do të përfshijë infrastrukturë të avancuar të AI-së, burime energjie në shkallë të gjerë dhe një rrjet të zgjeruar me fibra optike, duke e shndërruar Visakhapatnamin në një nga qendrat më të rëndësishme teknologjike në botë.

Thomas Kurian, CEO i Google Cloud, deklaroi se kjo është qendra më e madhe e inteligjencës artificiale që Google do të ndërtojë jashtë Shteteve të Bashkuara, duke e cilësuar si një investim strategjik për të përmbushur kërkesën në rritje për shërbime të AI-së në mbarë botën.

Ky projekt është pjesë e garës globale mes gjigantëve të teknologjisë si Microsoft, Amazon dhe Meta, të cilët po shpenzojnë miliarda për të ndërtuar infrastrukturë të re të qendrave të të dhënave. Qendra e re pritet të ketë ndikim të madh në sektorë si shëndetësia, arsimi, bujqësia dhe shërbimet publike, duke e pozicionuar Indinë si një fuqi të re në fushën e inteligjencës artificiale.