Pamjet e fundit të publikuara nga astronauti i NASA-s, Don Pettit, pas kthimit nga një mision 208-ditor në Stacionin Ndërkombëtar Hapësinor (ISS), tregojnë karvane të shumta satelitësh SpaceX që “shqyejnë” qiellin mbi horizont. “Pamja më e mirë e trenit satelitor Starlink që kam parë ndonjëherë nga orbita!”-tha Pettit. Kur përdoruesit e rrjeteve sociale e pyetën nëse ato ishin të dukshme me sy të lirë, Pettit u përgjigj pozitivisht. “Shumë të dukshme. Shumë ishin aq të ndritshme sa Jupiteri dhe ndriçonin për një deri në dhjetë sekonda.”
Pamjet e Pettit janë dëshmi e numrit të madh të satelitëve që kompania e Elon Musk po lëshon në orbitën e Tokës. Që nga tetori i këtij viti, më shumë se 8,000 satelitë aktivë Starlink po orbitojnë në orbitën e ulët të Tokës, ndërsa dhjetëra të tjerë joaktivë përbëjnë mbeturina hapësinore. Të dhëna të reja kanë treguar se deri në katër satelitë nga konstelacioni masiv Starlink bien në Tokë çdo ditë. Jonathan McDowell, astronom në Qendrën Harvard-Smithsonian për Astrofizikë në SHBA, regjistroi një mesatare prej një deri në dy satelitësh Starlink që dilnin nga orbita çdo ditë në vitin 2025. Ai pret që ky numër të rritet në rreth pesë satelitë në ditë, ndërsa SpaceX zgjeron konstelacionin e internetit në hapësirë.
Pamjet e satelitëve Starlink që bien në Tokë janë shfaqur në rrjete sociale javët e fundit, duke ngritur shqetësime se ato mund të paraqesin rrezik për njerëzit në tokë. Me një jetëgjatësi prej rreth pesë vjetësh, satelitët Starlink janë projektuar qëllimisht që të digjen plotësisht në atmosferën e Tokës përpara se të arrijnë në tokë. Dalja nga orbita e satelitit Starlink mund të mos përbëjë rrezik për njerëzit, por Dr. McDowell tha se kjo mund të jetë ende problematike. Shkencëtarët ende po përpiqen të kuptojnë se çfarë ndikimi mund të ketë kjo në atmosferën e Tokës. Ndotësit e krijuar gjatë djegies, siç janë grimcat e oksidit të aluminit, mund të kontribuojnë në ngrohjen atmosferike.
