Një valë mashtrimesh telefonike ka përfshirë përdoruesit e internetit ditët e fundit, duke u shtirur si thirrje zyrtare nga kompania Google.

Paralelisht, në rrjet janë përhapur raportime të rreme që pretendojnë se 2.5 miliardë llogari Gmail janë komprometuar, duke shkaktuar shqetësim të madh tek përdoruesit.

Google ka reaguar menjëherë me një deklaratë zyrtare, duke mohuar kategorikisht ekzistencën e ndonjë rrjedhje të tillë të dhënash.

Megjithatë, kompania ka konfirmuar rritjen e sulmeve të synuara përmes mashtrimeve telefonike të njohura si “phishing”.

Mashtruesit po telefonojnë qytetarë të pavetëdijshëm, duke u shtirur si punonjës të Google dhe duke përdorur numra të rremë, si p.sh.. +1 (650) 253-0000 – një numër që duket se i përket vetë kompanisë.

Gjatë thirrjes, viktimave u thuhet se në llogarinë e tyre janë zbuluar përpjekje të dyshimta për hyrje, dhe u kërkohet të ndryshojnë menjëherë fjalëkalimin ose të ndjekin një lidhje sigurie.

Në realitet, ky është një mashtrim i mirëorganizuar, pasi sapo përdoruesi ndjek udhëzimet e rreme, mashtruesit fitojnë akses të plotë në llogarinë dhe të dhënat e tij.

Google ka sqaruar se nuk kontakton kurrë me telefon për të kërkuar ndryshime fjalëkalimi apo për të zgjidhur probleme sigurie.

Të gjitha njoftimet zyrtare dërgohen vetëm përmes Gmail ose llogarisë Google.

Për të mbrojtur përdoruesit, Google rekomandon që të injorohen çdo telefonatë nga një numër i panjohur që pretendon të jetë nga kompania, të mbyllet menjëherë telefoni nëse kërkohet ndërhyrje në llogari, dhe të monitorohet aktiviteti i sigurisë përmes portalit zyrtar myaccount.google.com/security..

Ekspertët e sigurisë kibernetike këshillojnë përdoruesit të krijojnë fjalëkalime të forta dhe unike për secilin shërbim, të aktivizojnë verifikimin me dy hapa (2FA) përmes aplikacioneve si Google Authenticator dhe të përdorin menaxherë fjalëkalimesh për ruajtje të sigurt.