Amazon Web Services (AWS), gjiganti që shpesh cilësohet si “shtylla kurrizore e internetit”, ka pësuar një ndërprerje të madhe që goditi mijëra biznese dhe preku miliona përdorues në mbarë botën.

Ndër platformat e prekura ishin Snapchat, Reddit, Roblox, Fortnite, si dhe banka të njohura britanike si Lloyds dhe Halifax.

Kreu i kompanisë rivale Cloudflare reagoi me ironi, duke theksuar se problemi “nuk kishte asnjë lidhje me shërbimet e tij”.

AWS ofron infrastrukturën bazë për rreth një të tretën e internetit, duke siguruar fuqi llogaritëse, ruajtje të dhënash dhe menaxhim të bazave të të dhënave – çka i lejon kompanitë të shmangin mirëmbajtjen e serverëve të tyre fizikë. Por këtë herë, premtimi “na lini ne të kujdesemi për gjithçka” nuk u mbajt.

Shkaku i ndërprerjes ishte një gabim në Sistemin e Emrave të Domaineve (DNS) – një element thelbësor që funksionon si “harta” e internetit. Siç shpjegojnë ekspertët, kur DNS dështon, faqet ekzistojnë, por sistemi nuk di si t’i gjejë.

AWS konfirmoi se incidenti ndodhi në qendrën e të dhënave në Virxhinian Veriore, më e madhja dhe më e vjetra e kompanisë. Edhe pse nuk ka prova për ndonjë sulm kibernetik, ekspertët paralajmërojnë se dështime të tilla – qofshin teknike apo njerëzore – ekspozojnë rrezikun e varësisë globale nga një ofrues i vetëm.

AWS përballet me konkurrencë të drejtpërdrejtë nga Microsoft Azure dhe Google Cloud Platform, ndërsa rivalë më të vegjël janë IBM dhe Alibaba Cloud.

Në Evropë, disa kompani po përpiqen të krijojnë alternativa kontinentale – përfshirë Stackit, platformën e nisur nga kompania mëmë e zinxhirit të supermarketeve Lidl. Ngjarja ka rihapur debatin për nevojën e ndërtimit të infrastrukturës digjitale të pavarur, për të reduktuar varësinë nga gjigantët amerikanë të “cloud”-it – megjithëse shumë ekspertë dyshojnë se mund të jetë tepër vonë për ta arritur këtë.