Java e tretë e fazës së grupeve në Champions League nis sot me dy ndeshje interesante në orën 18:45: Kairat Almaty- Pafos dhe Barcelona-Olympiakos. Skuadra katalanase, edhe pse në emergjencë për shkak të mungesave, nuk mund të lejojë hapa të gabuar pas humbjes ndaj PSG-së. Kundër grekëve, që kanë vetëm një pikë në renditje, objektivi është i qartë: fitorja për t’u rikthyer në garë për kualifikim.

Në orën 21:00, programi sjell një seri supersfidash në arenën europiane. PSG, kampionët në fuqi të Europës, do të përballen me Bayer Leverkusen me synimin për të arritur fitoren e tretë radhazi dhe për të ruajtur pikët e plota. Gjermanët megjithatë mbeten një rival i fortë dhe i paparashikueshëm.

Me të njëjtin objektiv zbret në fushë edhe Arsenali, që pret në Londër Atletico Madridin në një përballje mjaft tërheqëse. “Topçinjtë” janë në formë të shkëlqyer, ndërsa skuadra e Simeones kërkon pikë për të qëndruar në garë, duke pasur aktualisht gjysmën e pikëve të londinezëve.

Në grupin tjetër, Copenhagen dhe Borussia Dortmund zhvillojnë një ndeshje të hapur për çdo rezultat, me vetëm tre pikë diferencë mes tyre. Gjithashtu përballja Villarreal-Manchester City pritet me interes të madh: skuadra e Guardiolës kërkon vazhdimësi, ndërsa spanjollët, pas barazimit ndaj Juventusit, synojnë një tjetër rezultat surprizë.

Në Angli, Benfica e José Mourinhos do të luajë në transfertë ndaj Newcastle United. Pas tre humbjeve radhazi, “Special One” është nën presion dhe ka nevojë urgjente për një fitore për ta mbajtur skuadrën portugeze në garë për kualifikim. /R.Lika-Koha Jonë/