Këngëtarja shqiptare e famshme, Bebe Rexha, do të interpretojë himnin kombëtar të Shteteve të Bashkuara të Amerikës, në finalen e dytë të Serisë Botërore të MLB 2025, një nga ngjarjet sportive më të mëdha të vitit në SHBA.

Artisja është shfaqur e emocionuar në postimet e saj të fundit në “Instagram”, duke ndarë me miliona ndekësit përgatitjet dhe entuziazmin për këtë moment të rëndësishëm.

Bebe ka treguar mbështetje për dy skuadrat finaliste, Los Angeles Dodgers dhe Toronto Blue Jays, duke i uruar fat për përballjen e madhe.

Ndërkohë mediat e huaja shkruajnë se në këtë ceremoni madhështore, përveç yllit të muzikës, do të marrin pjesë edhe artistë të njohur ndërkombëtarë si Pharrell Williams dhe Alessia Cara, e cila do të këndojë himnin kombëtar të Kanadasë.

Për Bebe Rexhën, kjo është një mundësi e veçantë për të qenë pjesë e një eventi historik, duke treguar edhe një herë lidhjen e saj të fortë me MLB dhe dashurinë për sportin në përgjithësi.

Ndërkohë, ajo vazhdon të shënojë sukses pas suksesi në industrinë muzikore. Sipas raportimeve të fundit nga InMusicBlog, Bebe dhe Dua Lipa janë ndër artistet shqiptare me më shumë këngë që kanë kaluar një miliard dëgjime në Spotify — katër dhe dymbëdhjetë këngë respektivisht.