Kisha “Fjetja e Shën Mërisë”, në fshatin Kosinë të Përmetit, është Monument Kulture, Kategoria I, me vlera të rralla kulturore dhe arkitekturore.

Në pamjen e jashtme ngarkesa dekorative e kësaj kishe tërheq vëmendjen duke qenë shumë interesante, pasi gërshetohen një sërë motivesh të realizuara me tulla në muraturë që formojnë simbole dhe shkronja: kryqe, harqe, korniza dhëmbësharrë, friza, kurrizpeshku etj).

Specialistët e Drejtorisë Rajonale të Trashëgimisë Kulturore Gjirokastër kyen gjatë kësaj jave një inspektim të gjendjes aktuale në kishë si dhe disa punime mirëmbajtjeje.

Për nga ndërtimi planimetriko-vëllimor, “Fjetja e Shën Mërisë” afron me kishat e tipit të Nerëzit, ku mjediset këndore perëndimore veçohen nga Naosi duke u lidhur me Narteksin.

Kjo kishë është e tipit kryq i brendashkruar ku formimi i kryqit bëhet nga mbulesa me sistem qemeri në brendësi dhe ndërtimi i çatisë në nivele të ndryshme në anën e jashtme.

Narteksi është në formë drejtkëndëshi dhe mbulohet me qemer cilindrik. Në pjesën qëndrore të Naosit vendosen dy shtylla dhe mure anësorë dhe tamburi me kupolën ngrihet me ndihmën e trekëndëshave sferikë. Tamburi është i ulët e me diametër të madh, përmasat e harqeve zbukuruese janë të mëdha dhe forma e tyre jorigoroze.