Turbulenca në LSDM pas humbjes në zgjedhje, kërkohen dorëheqje në kryesi
Pas rezultateve të dobëta në zgjedhjet lokale, ku LSDM fitoi vetëm gjashtë komuna, brenda partisë kanë shpërthyer pakënaqësi dhe dorëheqje. Pas largimit të zëvendëskryetares Ana Çupevska, dorëheqje të parevokueshme ka paraqitur edhe kandidati për kryetar të komunës së Gjorçe Petrovit dhe kryetar i degës komunale të LSDM-së, Kostadin Acevski.
SINKRON – Kostadin Acevski, kandidat për kryetar të Gjorçe Petrovit nga LSDM:

“Edhe pse dhashë të gjitha përpjekjet e mia pa kalkulim, rezultati është i dobët. Dorëzoj dorëheqje të parevokueshme nga funksioni i kryetarit të organizatës komunale. Mendoj se është e drejtë dhe e domosdoshme që lideri Filipçe dhe i gjithë udhëheqësia e LSDM-së të japin dorëheqje, jo vetëm për shkak të rezultateve, por edhe për mënyrën si ka vepruar partia në periudhën e kaluar.”

Pas këtyre zhvillimeve, kryetari i LSDM-së, Venko Filipçe, njoftoi se në ditët në vijim do të mbahen mbledhje të organeve partiake për të miratuar ndryshime dhe analiza të thella brenda strukturave.
SINKRON – Venko Filipçe, kryetar i LSDM-së:

“Këto zgjedhje janë tregues i qartë për LSDM-në dhe për mua si kryetar. Është e qartë çfarë ndryshimesh duhen bërë, si në aspektin politik ashtu edhe personal. Siç kam paralajmëruar, ndryshimet do të pasojnë në ditët në vijim në mbledhjet e Këshillit Ekzekutiv dhe atij Qendror.”

Filipçe bëri të ditur se nuk do të japë dorëheqje, por se partia do të vazhdojë procesin e konsolidimit pas humbjeve. Ai theksoi se rezultatet zgjedhore janë një sinjal për reflektim dhe ndryshim, ndërsa LSDM, sipas tij, mbetet forca e dytë në vend dhe e para në bllokun opozitar.