Një sulmues ka shpërthyer një bombë pranë një gjykate në kryeqytetin e Pakistanit, Islamabad, duke vrarë 12 persona, përfshirë veten dhe duke plagosur të paktën 27 të tjerë, sipas ministrit të Brendshëm të vendit, Mohsin Naqvi.

Naqvi tha se sulmuesi kishte planifikuar të hynte në godinën e gjykatës së distriktit, por nuk ia doli. Ai shtoi se autoritetet do të përpiqen të identifikojnë sa më shpejt personin që kreu sulmin dhe se të gjithë ata që kanë qenë të përfshirë do të dalin para drejtësisë, raporton BBC.

Sulmet vetëvrasëse në Islamabad kanë qenë të rralla vitet e fundit.

Të 27 personat e plagosur po marrin trajtim mjekësor, tha Naqvi. Ai shtoi se sulmuesi qëndroi për rreth 15 minuta pranë një makine policie, përpara se të shpërthente bombën.

Presidenti i Pakistanit, Asif Ali Zardari, dënoi ashpër sulmin vetëvrasës.

Një avokat, Rustam Malik, i cili ndodhej pranë vendit të ngjarjes, tha për agjencinë AFP se në momentin e shpërthimit po parkonte makinën e tij.
“U dëgjua një zhurmë shumë e fortë”, tha ai. “Ishte kaos i vërtetë. Avokatët dhe njerëzit po vraponin brenda kompleksit. Pashë dy trupa të pajetë pranë portës dhe disa makina që digjeshin”.