Kanë mbetur edhe dy ndeshje deri në fund të eliminatoreve të “Botërorit 2026”, Shqipëria ka në dorën e saj vendin në play off dhe mund të ëndërrojë për një kualifikim historik në finalet e një Kupe Bote. Kombëtarja e Shqipërisë ka zbarkuar sot në Andorë, ku duhet të fitojë me cdo kusht sfidën kundër përfaqësueses së këtij vendi në misionin e saj për të luajtur për herë të parë në histori në fazën e plej-off-it të një Botërori.

“Më e rëndësishme është ndeshja e parë me Andorrën dhe nuk duhet t’i nënvlerësojmë, pasi ata dinë të penalizojnë, sepse kanë lojën e tyre që nuk i pëlqen asnjë ekipi, të cilët mbrohen me çdo kusht që të mos pësojnë gol. Shpresoj të arrijmë ta fitojmë ndeshjen e parë dhe pastaj për të dytën do flasim më tej.”, – theksoi sulmuesi i Kombëtares, Indrit Tuci.

Përfaqësuesja e Kosovës ka vazhduar përgatitjet për dy ndeshjet vendimtare të këtij muaji kundër Sllovenisë dhe Zvicrës, në kuadër të kualifikimeve për Kampionatin Botëror 2026. Mediat kosovare duke raportuar nga këto përgatitje shkruajnë se – Sistemi apo vendosja e ekipit në fushë nuk pritet të ndryshojë, për më tepër që synimi primar i Kosovës është të fitohet pikë në Lubjanë. 

“Fillimisht përballemi me Slloveninë, ku synojmë të paktën një pikë, edhe pse me grupin e lojtarëve që kemi mund të shkojmë për fitore. Me këtë grup lojtarësh, mundemi dhe meritojmë të jemi pjesë e Botërorit.”, ka thënë Baton Zabërgja i cili për shkak lëndimit ishte lënë jashtë grumbullimit të tetorit. 

Në grup, vendi i parë siguron kualifikimin direkt në Botërorin e vitit të ardhshëm që mbahet në SHBA, Kanada e Meksikë, ndërsa vendi i dytë do të luajë në play-off për të siguruar pjesëmarrjen. (Gazetar: Safet Admei)