Ndaj Andorrës, Shqipëria kishte kontrollin total të lojës, 66% mbajtja e topit, tentuan 12 herë portën, por vetëm 2 goditje ishin në kuadrat, një shans i artë, një gol. Andorra na vendosi pak ose aspak në vështirë, asnjë rast i rrezikshëm në portën e Strakoshës. Kjo ishte një ndeshje e vështirë, e mbyllur dhe ashtu rezultoi, fundja edhe Anglia hasi vështirësi duke fituar po 1-0 në Andorra, ashtu si edhe Shqipëria. Ndaj një rivali të tillë diferencën e bëri një gol i Asllanit dhe në fund të ndeshjes, mesfushori i Torinos rezultoi lojtari më i vlerësuar me notën 8,3 sipas “SofaScore”.

Lojtari i dytë me notën më të lartë ishte Berat Gjimshiti, me kapitenin që udhëhoqi ekipin jo vetëm në prapavijë, por shpesh shtyu lojtarët drejt sulmit, madje flirtoi edhe me golin teksa në fundin e pjesës së parë goditi traversën. Mbyll podiumin si lojtari më i vlerësuar në këtë takim Mario Mitaj, me anësorin kuqezi që u vlerësua me notën 7,6.

Për fat të keq, lojtari me notën më të ulët në këtë takim rezultoi Armando Broja, me sulmuesin kuqezi që u vlerësua me 6,6, i vetmi lojtar me notën nën 7-të në radhët e kuqezinjve. Paraqitja e tij, jo pozitive, bëri që edhe vetë Broja të shpërthente në lot pas këtij takimi. Pas Brojës, gjithnjë sipas “SofaScore”, faqes së specializuar për statistikat, dy lojtarët me notën më të ulët rezultojnë Rey Manaj me 7 dhe dyshja Hoxha-Laçi me 7,1.

(BalkanWeb)