Lidhja e Sindikatave të Maqedonisë (LSM) njofton se vendi vazhdon të mbetet i fundit në rajon për nga lartësia e pagës minimale, e cila tani është 397 euro dhe, sipas njoftimeve të Qeverisë, nuk do të ndryshojë deri në mars të vitit 2026, përveç një harmonizimi ligjor që nuk do të kalojë 1.600 denarë. Sipas LSM-së, kjo e lë Maqedoninë në pozitën më të pafavorshme në rajon dhe punëtorët në kushte të thella varfërie, ndërsa vendet fqinje po bëjnë hapa të dukshëm përpara.

Sipas krahasimeve të sindikatës, pothuajse të gjitha shtetet e rajonit kanë miratuar tashmë rritje të mëdha të pagave minimale:

– Kosova e rrit pagën minimale nga 350 në 500 euro në dy faza: 425 euro nga janari 2026 dhe 500 euro nga korriku 2026.
– Shqipëria, nga 1 janari 2026, e rrit pagën minimale në 500 euro për mbi 307 mijë të punësuar, ndërsa qeveria do të subvencionojë kontributet për sektorin privat me 90 milionë euro për 9 muaj.
– Serbia e ka 500 euro pagën minimale nga tetori 2025, ndërsa nga janari 2026 do të jetë 550 euro.
– Në Republika Srpska, paga minimale nga janari 2026 do të jetë nga 512 deri në 743 euro, varësisht shkallës së kualifikimit.
– Në Bosnje dhe Hercegovinë, paga minimale për vitin 2025 është 511 euro.
– Në Mali të Zi, paga minimale është 600 euro për punëtorët me arsim të mesëm dhe 800 euro për punëtorët me arsim të lartë.

LSM kritikon se Qeveria ka gjetur aleatë edhe te disa punëdhënës dhe te sindikata si KSS, të cilat – sipas tyre – përsërisin se mjafton të zbatohet ligji, duke u vënë në kah të kundërt me interesat e punëtorëve.

Lidhja e Sindikatave rikujton se ka organizuar një sërë protestash për rritjen e pagës minimale dhe paralajmëron se, nëse Qeveria dhe punëdhënësit vazhdojnë me këtë qasje, vendi mund të shkojë drejt një greve të përgjithshme.

“Sot kemi Qeveri, punëdhënës dhe KSS në të njëjtën anë, të kënaqur që punëtorët maqedonas po fundosen në varfëri dhe kanë pagën minimale më të ulët në rajon – por gjithçka qenka sipas ligjit”, reagojnë nga LSM.

Sindikatat theksojnë se ndërkohë pagat e funksionarëve nuk u prekën dhe mbetën të rritura për 79%, ndërsa Buxheti për vitin 2026 nuk parasheh fonde për rritje të dukshme të pagës minimale jashtë harmonizimit të zakonshëm ligjor.

“Ne luftojmë sepse punëtori meriton pagë dinjitoze, jo një numër statistikor. Luftojmë sepse rajoni po ecën përpara, ndërsa Maqedonia po i shtyn punëtorët mbrapsht. Luftojmë sepse pa punëtor nuk ka ekonomi. Luftojmë sepse 397 euro nuk janë jetë, por mbijetesë”, thuhet në reagimin e LSM-së.

LSM thekson se protestat do të vazhdojnë “derisa paga minimale të rritet dhe derisa çdo punëtor të ketë dinjitet”./VOXAL/