Me gjithë zhurmën politike dhe premtimet e bujshme për investimin më të madh kapital në Çair, Ministria e Transportit dhe Lidhjeve ka anuluar tenderin për ndërtimin e fazës së tretë të sheshit “Skënderbeu”. Vendimi ka ardhur vetëm një ditë para përfundimit të afatit për dorëzimin e dokumentacionit, duke rritur dilemat për seriozitetin dhe transparencën e procesit, shkruan gazeta KOHA.
Tenderi, i shpallur më 17 tetor me një vlerë prej 21.200.000 euro, parashikonte ndërtimin e sheshit të shumëpërfolur dhe të parkingut nëntokësor me mbi 400 vende. Megjithatë, më 3 nëntor – një ditë para se kompanitë ndërtuese të dorëzonin dokumentet (afati 4 nëntor), procesi u anulua. Sipas Ministrisë së Transportit, arsyeja zyrtare është se “dokumentacioni i tenderit përmban lëshime ose mangësi të konsiderueshme”. Nga 3 nëntori e këtej, nuk është dhënë asnjë informacion nëse dhe kur tenderi do të rishpallet.
Ky investim ishte shndërruar në një nga kartat kryesore politike të zyrtarëve shqiptarë të VLEN-it në Qeveri. Më 16 shtator, afër një muaj para zgjedhjeve lokale, zëvendëskryeministri Izet Mexhiti deklaroi se Qeveria kishte siguruar 25 milionë euro për fazën e tretë të sheshit “Skënderbeu” dhe për parkingun modern nëntokësor. Sipas tij, projekti do të zgjidhte një nga problemet më të mëdha urbane të Çairit dhe Çarshisë – mungesën e hapësirave për parkim. “Nuk po flasim për projekte në letër, por për investime që po bëhen realitet. Çairi po fiton infrastrukturën që i takon, hapësira moderne dhe zhvillim urban që i ndryshon jetën përditshmërisht qytetarëve”, kishte shkruar Mexhiti në Facebook.
Edhe zëvendësministrja e Transportit, Kaltrina Zekolli Shaqiri, më 17 tetor konfirmoi fillimin e procesit të tenderimit, duke e quajtur projektin “investimi më i madh në historinë e komunës së Çairit”. Ajo paralajmëroi se ndërtimi do të niste së shpejti dhe se sheshi do të merrte një funksion të ri, me hapësira të çliruara për aktivitete publike, manifestime dhe kulturë, raporton KOHA.
Për parkingun nëntokësor dhe fazën finale të sheshit “Skënderbeu” flitet prej më shumë se një dekade. Punimet e para nisën në vitin 2012, por prej vitit 2018 nuk është ndërmarrë asnjë hap i prekshëm. Në çdo palë zgjedhjesh, sheshi ka qenë ndër premtimet kyçe për shqiptarët në Shkup, por përveç platosë mbi bulevardin “Goce Dellçev” dhe muralit që përshkruan figurat historike shqiptare, projekti nuk ka ecur përpara.
Anulimi i tenderit të radhës është vetëm një tjetër episod në sagën e gjatë të një premtimi të pambajtur, duke lënë qytetarët e Çairit edhe një herë në pritje të zgjidhjeve reale për hapësirën publike dhe parkimin. Ndërkohë, mbetet e paqartë kur – dhe nëse – Ministria e Transportit do të rishpallë tenderin për projektin që për vite me radhë është përdorur si kartë politike, por që ende nuk ka marrë formë në terren. (koha.mk)
