Kryeministri Hristijan Mickoski po merr pjesë në takimin e liderëve të Ballkanit Perëndimor me komisioneren për zgjerim të BE-së, Marta Kos, në Tiranë, përcjell TV21. Përmes një shkrimi në rrjetin social Facebook, Mickoski thekson se Maqedonia e Veriut mbetet e orientuar drejt integrimeve evropiane dhe bashkëpunimit rajonal.

“Sot po marr pjesë në Samitin e liderëve “Rruga jonë drejt BE-së”, i cili po mbahet në Tiranë, Shqipëri. Ky tubim i rëndësishëm përfaqëson një mundësi të shkëlqyer për thellimin e dialogut dhe forcimin e përpjekjeve të përbashkëta të vendeve të Ballkanit Perëndimor në procesin e afrimit me Bashkimin Evropian. Vendi ynë mbetet vendosmërisht i orientuar drejt integrimeve evropiane dhe bashkëpunimit rajonal, si shtylla kyçe të vizionit tonë të përbashkët për një Ballkan Perëndimor të begatë”, ka shkruar mes tjerash Mickoski.