Janari pritet të sjellë lëvizje të rëndësishme për Arbër Hoxhën. Anësori i Kombëtares shqiptare është futur në radarin e dy klubeve angleze, Sheffield United dhe Hull City, që po konkurojnë për shërbimet e 27-vjeçarit.

Sipas “Sportsboom”, të dy klubet po përgatiten për të ofruar oferta konkrete në merkaton e dimrit. Performancat e Hoxhës me Dinamo Zagreb dhe Kombëtaren shqiptare kanë rritur ndjeshëm vlerësimin ndaj tij. Sheffield United ka një avantazh të lehtë falë fuqisë më të madhe financiare, e cila mund të ndikojë në bisedimet përfundimtare.

Hull City ka një armë tjetër në favor të tij: trajnerin Sergej Jakirovic. Teknik kroat ka punuar më parë me Hoxhën në Dinamo Zagreb, ku lojtari shënoi 4 gola dhe dha 3 asistime në 31 ndeshje. Jakirovic ka tentuar ta marrë Hoxhën edhe gjatë kohës së tij te Kayserispor dhe tani shpreson të përdorë marrëdhënien e tyre për ta transferuar në EFL Championship.

Dinamo Zagreb nuk ka nxjerrë ende në shitje Hoxhën, sidomos pasi i rinovoi kontratën deri në vitin 2029. Megjithatë, paga e tij e moderuar, rreth 500 mijë euro në vit, e bën lojtarin një objektiv të arritshëm për klubet angleze.

E ardhmja e Arbër Hoxhës mbetet e hapur, por një gjë është e qartë: emri i tij është ndër më të nxehtit në janar.