Shqipëria ndodhet vetëm një hap larg arritjes më të madhe në historinë e futbollit të saj: kualifikimit në Kupën e Botës. Entuziazmi në vend është më i larti i viteve të fundit dhe këtë atmosferë e përshkruan vetë trajneri kuqezi Sylvinho në një intervistë të dhënë për Gianluca Di Marzio. Pas fitores në Serbi, thotë Sylvinho, gjithçka ndryshoi.

“Kur u kthyem në Shqipëri pas asaj ndeshjeje, na pritën me një entuziazëm të jashtëzakonshëm. Është kënaqësi të vendosësh Shqipërinë në qendër të vëmendjes jo vetëm për natyrën dhe turizmin, por edhe për futbollin.”

Trajneri brazilian e quan përvojën e tij një projekt të gjatë dhe të dashur:

“Është një periudhë shumë e bukur për mua. Kam pasion për vendin, për njerëzit. Jemi këtu prej tre vitesh duke ndërtuar diçka serioze dhe duhet t’i falënderoj të gjithë lojtarët. Kualifikimi në playoff është një arritje madhore, por tani duhet të përgatitemi edhe për hapin e ardhshëm.”

Sylvinho nënvizon edhe përzierjen e stileve të lojës që kanë formuar skuadrën kombëtare: “Jemi shumë të organizuar. Shqipëria është një miks: ka qarkullim të topit si në Spanjë, intensitet të futbollit britanik dhe unë kam edhe pak ADN braziliane.”

Strategu brazilian foli edhe për formatin e ri të Botërorit me 48 skuadra dhe për faktin se në playoff do të vijnë edhe ekipe të forta si Italia, Suedia apo Polonia.

“Vetëm katër skuadra do të dalin nga kjo fazë. Nuk është aspak e lehtë. Për ne, forca kryesore është bindja se mund ta bëjmë.”

Sa i përket kalendarit, trajneri nuk e ka ende të qartë se ku mund të vendoset data e playoff-it. “Kemi lojtarë në çdo cep të botës dhe kjo e vështirëson organizimin.”

Sylvinho shpjegon se periudha deri në mars do të jetë vendimtare, me vizita tek futbollistët në vendet ku luajnë. “Jam shumë komunikues. Do të udhëtojmë për t’i takuar lojtarët, të pimë kafe me ta, të flasim dhe të shohim stërvitjet. Marrëdhëniet me futbollistët dhe klubet janë shumë të mira dhe nga janari puna duhet të jetë akoma më e detajuar.”

Trajneri vlerëson nivelin e lojtarëve shqiptarë që luajnë në Itali: “Serie A është kampionat i fortë, me shumë taktikë dhe intensitet fizik. Dhe kjo shihet tek progresi i lojtarëve tanë.”

Ndër emrat e rinj që po rriten shpejt, Sylvinho përmend Medon Berishën e Lecce-s dhe Adrion Pajazitin e Hajdukut të Splitit: “Të dy kanë bërë hapa të mëdhenj. Janë të ndryshëm si profil, por kanë potencial të lartë dhe unë besoj shumë tek ata.”

Në fund, braziliani pranon se gjithçka tani varet nga muaji mars: një muaj që mund të vendosë historinë e Shqipërisë në futbollin botëror. “Na mbetet vetëm një mozaik i vogël për të vendosur. Tani duhet të presim pranverën.”