Presidenti i Ukrainës, Volodymyr Zelensky, deklaroi të enjten se Shtetet e Bashkuara kanë propozuar një plan kompromisi në bisedimet për paqe që përfshin tërheqjen e trupave ukrainase nga rajoni i Donbasit dhe krijimin e një “zone të lirë ekonomike” në territorin e diskutuar.

Zelensky tha se ky propozim, i ndihmuar nga pala amerikane në kuadër të negociatave për t’i dhënë fund luftës me Rusinë, përfshin idenë që forcat ukrainase të tërhiqen nga zonat që kontrollon në Donetsk dhe pjesë të tjera të Donbasit, ndërsa territori të administrohet si një zonë e lirë ekonomike dhe e demilitarizuar. Pavarësisht kësaj, ai theksoi se detajet mbi qeverisjen dhe sigurinë e kësaj zone mbeten të paqarta. 

Sipas raportimeve të agjencisë Reuters, pala amerikane sheh krijimin e kësaj zone si një kompromis midis kërkesave ruse për kontroll të plotë të Donbasit dhe refuzimit ukrainas për të dorëzuar territorin nën kontrollin e Moskës. Megjithatë, Zelensky pohoi se Ukraina ende nuk është dakorduar për propozimin, derisa të ketë garanci se forcat ruse nuk do të hyjnë në territorin pas tërheqjes së trupave ukrainase. 

Zelensky vuri në dukje se bisedimet e udhëhequra nga SHBA-ja përfshijnë edhe çështje të tjera të gjera, si garancitë e sigurisë dhe kontrolli mbi centralin bërthamor të Zaporizhias, por se propozimi i zonës së lirë ekonomike është një nga çështjet kryesore të debatit midis palëve. 

Presidenti ukrainas theksoi rëndësinë që çdo vendim për vijat kufitare ose statusin e territorit të Moskesë apo Donbasit të miratohet nga populli ukrainas, duke nënvizuar se çdo kompromis duhet të jetë i pranueshëm për qytetarët e vendit përmes referendumit ose proceseve demokratike.