Disa rrugë në lagje të ndryshme të qytetit të Kërçovës ndodhen në gjendje të rëndë, të mbushura me gropa të shumta, çka vështirëson qarkullimin dhe shkakton dëmtime të konsiderueshme në automjetet që kalojnë çdo ditë nëpër to.

Qytetarët shprehin shqetësimin e tyre dhe kërkojnë nga Komuna e Kërçovës që urgjentisht të ndërmarrë masa për sanimin e këtyre rrugëve, pasi gjendja aktuale paraqet rrezik për sigurinë në komunikacion dhe rrit shpenzimet për mirëmbajtjen e veturave.

Megjithatë, deri më tani nga Komuna e Kërçovës nuk ka pasur ndonjë reagim konkret apo ndërhyrje për mbushjen e gropave dhe riparimin e rrugëve të dëmtuara. Po ashtu, mbetet e paqartë nëse janë paraparë mjete financiare në buxhetin komunal për sanimin e këtyre rrugëve në periudhën në vijim.

Banorët presin që institucionet përgjegjëse të reagojnë sa më parë, me qëllim që të parandalohet përkeqësimi i mëtejshëm i infrastrukturës rrugore dhe të sigurohet një lëvizje më e sigurt për të gjithë pjesëmarrësit në komunikacion.