Vlera e shportës minimale sindikale që llogarit Lidhja e Sindikatave të Maqedonisë (LSM) për muajin dhjetor të këtij viti arrin 65.492 denarë dhe është rritur për 319 denarë krahasuar me shportën minimale të muajit të kaluar, e cila ishte 65.173 denarë, përcjell TV21. LSM sot njoftoi se nëse i shtohet qiraja për një apartament me qira prej 60 metra katrorë, shporta minimale sindikale për dhjetor arrin 80.867 denarë.

Sipas llogaritjeve të LSM, për dhjetor për ushqim dhe pije janë të nevojshme 23.640 denarë, për Arsim 7.159 denarë, për qira, ujë, energji elektrike dhe ngrohje 6.130 denarë, veshje dhe këpucë 5.875 denarë, transport 4.636 denarë, Restorante dhe hotele 4.131 denarë, komunikim 3.417 denarë, higjienë personale dhe mirëmbajtje e higjienës në shtëpi 2.620 denarë.

Zv/ministri i Ekonomisë dhe Punës, Marjan Risteski, më 17 dhejtor njoftoi se nga 1 janari, përveç që sindikatat do të llogarisin shportën minimale të konsumit, edhe Qeveria do të bëjë llogaritjen për shportën mesatare të konsumit, e cila do të jetë për një familje me të paktën katër anëtarë. Kjo çështje do të diskutohet në Këshillin Ekonomik-Social, i cili është caktuar për 22 dhjetor (e hënë).

“Do të merren parametrat nga marketet më të mëdha në Maqedoni, parametrat do të merren nga produktet bazë ushqimore, për gjithçka që nevojitet për një jetë mesatare, për një familje mesatare në Maqedoni. Gjithashtu do të merren të dhëna nga rajone të ndryshme, dhe shpesh frutat dhe perimet do të jenë ato që janë karakteristike për periudhën kur llogaritet gjatë vitit”, deklaroi Risteski.