Deputetja nga radhët e Lëvizjes Besa, përmes një postimi në Facebook, ka shkruar për kultin e personalitetit, duke e përkufizuar atë si një fenomen politik dhe shoqëror në të cilin një individ paraqitet si figurë e pagabueshme, e domosdoshme dhe e pazëvendësueshme. Sipas saj, në këto rrethana çdo kritikë ndaj këtij individi sulmohet, delegjitimohet ose ndalohet, çka krijon një klimë frike dhe konformizmi në shoqëri.

Postimi i plotë i deputetes Valbona Adili Emini:

KULTI I PERSONALITETIT është një fenomen politik dhe shoqëror ku një individ paraqitet si figurë e pagabueshme dhe e domosdoshme.

Çdo kritikë ndaj tij sulmohet ose ndalohet.

Ky kult ndërtohet me qëllim për të forcuar pushtetin personal dhe për të zëvendësuar institucionet me një figurë të vetme.

Kulti i personalitetit është “ushqim psikologjik” për individë me tipare narcisiste dhe paranojake.

NARCIZMI është nevoja ekstreme për adhurim, vetëbesimi i tepruar dhe mungesa e empatisë ndaj të tjerëve.

PARANOJA është frika e vazhdueshme nga “armiqtë”, dyshimet e pabazuara dhe bindja se të tjerët po komplotojnë kundër teje, edhe pa asnjë provë reale.

SI NDËRTOHET KULTI I PERSONALITETIT?

-Me propagandë të vazhdueshme në media

-Me lavdërim të përditshëm të individit

-Me zmadhim të arritjeve dhe fshehje të dështimeve

-Me mitizimin e figurës si “shpëtimtar”, “babai i kombit” apo udhëheqës i pazëvendësueshëm.

### Historia ka treguar se aty ku ndërtohet kulti i personalitetit, demokracia dobësohet dhe shoqëria humbet zërin e saj kritik###