Bashkimi Demokratik për Integrim (BDI) ka reaguar ashpër ndaj, siç e cilëson, trajtimit çnjerëzor, poshtërues dhe diskriminues të 76 të punësuarve në Ministrinë për Marrëdhënie Ndëretnike, të gjithë shqiptarë, të cilët sipas partisë janë thirrur në punë dhe janë mbajtur të mbyllur në zyra pa kushte minimale dhe pa asnjë detyrë konkrete pune informon Tetovasot.
Në deklaratën për media, BDI thekson se dhjetëra gra dhe burra janë vendosur në vetëm tri zyra, pa karrige, pa tavolina pune, pa kompjuterë dhe pa mjete elementare, duke u detyruar të qëndrojnë në këmbë nga ora 08:00 deri në 16:00. Sipas BDI-së, kjo përbën formë të hapur të mobingut institucional dhe torturës psikologjike.
Partia opozitare e cilëson “turp shtetëror” faktin që punonjësit, për të përballuar ditën e punës, janë detyruar të ulen në dysheme dhe të sjellin batanije nga shtëpia, duke theksuar se kjo shkel çdo standard ligjor, moral dhe evropian, si dhe cenon rëndë dinjitetin njerëzor.
BDI kritikon gjithashtu reagimin e institucioneve pas publikimit të pamjeve, duke akuzuar se në vend të marrjes së përgjegjësisë, situata është keqpërdorur për linçim moral. Në këtë kontekst, partia reagon ashpër ndaj deklaratave të Kryeministrit, i cili, sipas BDI-së, ka akuzuar punonjësit për “imoralitet”.
“Bëhet fjalë për gra shqiptare – nëna, motra dhe bashkëshorte – të cilat janë poshtëruar nga shteti i tyre dhe më pas janë sulmuar publikisht nga kreu i qeverisë. Kjo është vijë e kuqe e kaluar dhe nuk mund të justifikohet apo të relativizohet,” thuhet në reagim.
BDI thekson se nuk bëhet fjalë për struktura partiake, por për nëpunës shteti, ndaj të cilëve vetë shteti ka detyrim të sigurojë kushte pune dhe trajtim dinjitoz. Partia kërkon që Kryeministri të kërkojë menjëherë falje publike ndaj punonjësve, familjeve të tyre dhe komunitetit shqiptar për, siç thuhet, gjuhën fyese dhe legjitimimin e praktikave diskriminuese.
Në fund, BDI kërkon përgjegjësi të plotë politike dhe administrative për këtë rast, ndërprerje të menjëhershme të trajtimit çnjerëzor dhe rikthim të kushteve normale dhe dinjitoze të punës për të gjithë të punësuarit, duke theksuar se institucionet shtetërore nuk guxojnë të shndërrohen në hapësira ndëshkimi kolektiv mbi baza etnike