Kandidati për kryetar komune të Gostivarit nga radhët e AKI-së, Valvon Limani përmes një press konference gjatë ditës së sotme ka prezantuar vizioinin e tij për Gostivarin duke paraqitur projekte infrstrukturore dhe program për arimin dhe zhvillimin e Gostivarit modern, shkruan Top24

Të nderuar qytetarë, përfaqësues të mediave, Ju falënderoj që jeni sot këtu. Vij para jush për të ndarë vizionin tonë për një Gostivar modern, të zhvilluar dhe të drejtë për të gjithë qytetarët. Gjatë 15 muajve të mandatit tonë kemi dëshmuar se me punë, vullnet dhe integritet, rezultatet janë të prekshme. Tani synojmë një kapitull të ri për qytetin tonë, të bazuar në projekte konkrete që përmirësojnë jetën e përditshme të qytetarëve. Një nga projektet më të rëndësishme është ndërtimi i urës së re mbi lumin Vardar, të quajtur “Ura e Harmonisë”. Të gjitha procedurat administrative dhe ligjore për këtë projekt kanë përfunduar dhe në pranverë nisin punimet. Ura do të ketë katër korsi për automjete, shtigje për biçikleta dhe trotuare të sigurta për këmbësorë. Ajo do të lidhë lagjet e qytetit, do të lehtësojë komunikacionin dhe do të japë shtysë reale zhvillimit ekonomik të Gostivarit. Paralelisht, kemi nisur transformimin e bulevardit kryesor të qytetit. Ai tashmë është përfunduar deri në afërsi të Pallatit të Kulturës, me gjatësi 1.657 metra dhe katër korsi funksionale. Po ashtu, kemi arritur marrëveshje me pronarin e njërës nga objektet që pengonte zgjerimin e sipërfaqes rrugore, konkretisht objekti mes ndërtesës së komunës dhe urës ekzistuese mbi lumin Vardar. Projekti është gati dhe në pranverë fillon realizimi i punimeve për këtë pjesë të Bulevardit. Jemi duke zhvilluar bisedime intensive edhe me pronarët e objekteve në pjesën tjetër të Bulevardit, nga udhëkryqi i rrugës së Dibrës deri te udhëkryqi i rrugës për në Spitalin e qytetit. Bisedimet janë konstruktive, me besim të ndërsjellë, dhe presim që marrëveshjet të finalizohen në një afat të shkurtër. Bulevardi do të shndërrohet në zemrën urbane të Gostivarit, me ndriçim modern, shtigje për biçikleta dhe hapësira të gjelbra për qytetarët. Do të jetë një hapësirë funksionale dhe sociale, ku qyteti zhvillohet bashkë me njerëzit e tij. Qasja jonë ndaj zhvillimit është e planifikuar, e barabartë dhe gjithëpërfshirëse. Çdo qytetar, në çdo lagje dhe fshat përreth Gostivarit, do të jetë pjesë e këtij transformimi. Faleminderit për besimin tuaj. Me vizion, punë dhe përgjegjësi, do të vazhdojmë të ndërtojmë një Gostivar më të fortë dhe më modern – me Gostivarin në zemër.