Në vigjilje të natës së ndërrimit të viteve, Presidenti Bajram Begaj i është drejtuar me një mesazh urimi shqiptarëve brenda dhe jashtë kufijve.

“Me përulësi për sfidat që kemi përpara, me besimin te vlerat e punës, solidaritetit dhe përgjegjësisë qytetare, dhe me vendosmëri për të ndërtuar të ardhmen tonë evropiane, ju uroj nga zemra: Gëzuar Vitin e Ri 2026!”

Një apel të veçantë kreu i shtetit ka për klasën politike, të cilën e fton të udhëhiqet në misionin e saj nga dy parime përgjatë vitit që po troket.

“Interesi kombëtar dhe dialogu duhet të udhëheqin veprimet tona për të ndërtuar një shoqëri më të drejtë dhe më të begatë, sepse ajo që na bashkon është më e fortë se çdo interes që na ndan. Ndaj, në vigjilje të Vitit të Ri 2026, urimi im i parë është për bashkëpunim dhe bashkërendim rreth qëllimeve e interesave mbarëkombëtare!”

Mbërritja në stacionin final, atë të Bashkimit Europian, sipas kreut të shtetit duhet të jetë edhe sfida e radhës për shqiptarët.

“Viti që po mbyllet ishte një vit përpjekjesh dhe sfidash, ku Shqipëria dëshmoi sërish vullnetin për të ecur përpara. Forcuam rolin tonë ndërkombëtar dhe hodhëm hapa konkretë drejt Bashkimit Evropian. Kemi shënuar progres në forcimin e shtetit të së drejtës, në luftën kundër korrupsionit dhe krimit të organizuar dhe në pavarësinë e sistemit të drejtësisë. Të inkurajuar nga sukseset dhe të përulur nga mosarritjet, viti 2026 duhet të jetë viti i një përpjekjeje të përbashkët për ta kthyer standardin evropian në një realitet të prekshëm në jetën e çdo familjeje shqiptare”.

Një urim të veçantë në mesazhin e fundvitit Presidenti Begaj bën edhe për mjekët, infermierët, anëtarët e Forcave të Armatosura, punonjësit e rendit, zjarrfikësit dhe gazetarët, të cilët do të jenë në krye të detyrës natën e ndërrimit të viteve.

“Zoti ju bekoftë ju dhe familjet tuaja! Gëzuar!”

Tv Klan

/tvklan.al