Në horizont shfaqet një tjetër kandidat për Kristjan Asllanin. Nga Spanja vijnë konfirmime se ka një interes konkret nga Girona me klubin katalanas që ka bërë një sondazh për mesfushorin e kombëtares shqiptare që është te Torino por që kartoni i tij është në pronësi të Interit.

Gjithnjë sipas asaj që publikohet në median spanjolle, Girona ka kontaktuar me Interin për të marrë informacione në lidhje me disponibilitetin e Asllanit dhe për të kuptuar hapësirat për një operacion të mundshëm në këtë sesion të merkatos së transferimeve. Nuk është hera e parë që një klub spanjoll troket në dyert e Interit për të siguruar shërbimin e Kristjan Asllanit. 

Gjatë muajve të verës, Real Betis bëri një ofertë prej 15 milionë eurosh për mesfushorin kuqezi, por ky i fundit dëshironte qëndrimin në Serie A. Më pas ishte Bologna që tentoi blerjen përfundimtare të Asllanit, që në fund zgjodhi të kalojë te Torino në formë huazimi. Tani e ardhmja e mesfushorit shqiptar vihet sërish në dyshim teksa ditët e fundit është folur për mundësinë e zgjidhjes përpara kohe të kontratës së huazimit të Asllanit nga ana e klubit granata që do të thoshte kthim i tij te Interi.