Vërshimet e shkaktuara si pasojë e reshjeve të dendura të shiut kanë krijuar probleme në disa vendbanime të Komunës së Kërçovës. Më të goditur janë banorët e lagjes “Prilepska”, të cilët jetojnë përgjatë lumit të Zajazit.

Kryetari i Komunës së Kërçovës, Aleksandar Jovanovski, bëri të ditur se në bashkëpunim me institucionet përkatëse është formuar shtabi i krizës për t’u dalë në ndihmë familjeve të prekura. Sipas tij, banorët e evakuuar janë strehuar përkohësisht në palestrën sportive në Ivanidoll.

Ndërkohë, Besnik Selimi nga Kryqi i Kuq njoftoi se për familjet e prekura janë siguruar ndihma elementare, duke përfshirë ushqime dhe mjete të nevojshme për qëndrimin e përkohshëm.

Ekipet e shtabit të krizës janë në terren dhe po punojnë intensivisht në pastrimin dhe sanimin e shtëpive të dëmtuara nga vërshimet.