Kryetari i Partisë Demokratike të Kosovës, Bedri Hamza, ka reaguar pas përfundimit të numërimit të votave, duke falënderuar qytetarët për mbështetjen dhe duke theksuar se PDK-ja ka dalë e dyta me gjithsej 192,407 vota.

Në një status Hamza ka thënë se ky rezultat merret me përgjegjësi të madhe dhe përfaqëson një dëshmi të besimit që qytetarët kanë ndaj PDK-së dhe vlerave që ajo përfaqëson.

“Sot, pas një gare të vështirë dhe të pabarabartë, ruajtja e votës sonë është dëshmi se mijëra qytetarë besojnë në punën, seriozitetin dhe vlerat që PDK-ja i përfaqëson”, ka theksuar Hamza.

Ai ka shtuar se ky besim e obligon PDK-në që të riorganizohet, të konsolidojë radhët dhe ta intensifikojë veprimin politik në të gjitha nivelet.

“PDK do të vazhdojë të punojë për çdo qytetar, pa dallim, në çdo platformë ku jemi të pranishëm, me këmbëngulje dhe me bindjen se Kosova meriton më shumë dhe më mirë”, ka deklaruar ai.

Në fund, Hamza ka falënderuar qytetarët për mbështetjen dhe ka theksuar se puna e PDK-së do të vazhdojë./GazetaInfokus