BDI në një kumtesë për media thotë e tre muaj pas mbajtjes së zgjedhjeve lokale, në Komunën e Çairit asnjë nga premtimet e Izet Mexhitit nuk është realizuar, madje nuk ka nisur as edhe një punë e vetme konkrete në terren.

"Para zgjedhjeve, qytetarëve të Çairit iu premtua zhvillim, investime, projekte infrastrukturore, arsim i mirëfilltë, pastërti, përmirësim i jetës së përditshme e çka jo. Sot, pas tre muajsh qeverisjeje lokale, realiteti është krejtësisht i kundërt: premtime boshe, mashtrim elektoral dhe mungesë totale veprimi".

"Sot, asnjë shkollë nuk është renovuar, nuk ka asnjë investim të dukshëm në terren, Çairi vazhdon të ketë mbeturina gjithandej, ndërsa ka humbur fuqia e shqiptarëve në ndërmarrjet e Qytetit të Shkupit. Ajri mbetet i ndotur, ndërsa rrugët gjithë baltë dhe gropa të pakalueshme, të hapura para zgjedhjeve dhe që, edhe pas tre muajsh, nuk janë mbyllur. Kjo nuk është qeverisje, por menaxhim i dështuar dhe mashtrim ndaj qytetarëve".

"Situata është po aq alarmante edhe brenda administratës komunale. Komuna funksionon pa kryetar gjatë pjesës më të madhe të ditës, pasi Izet Mexhiti, si gjithmonë, shfaqet vetëm pasdite, duke e trajtuar udhëheqjen e komunës si çështje dytësore. Kjo mungesë përgjegjësie reflektohet drejtpërdrejt në kaosin institucional dhe mungesën e vendimmarrjes".

"E vetmja “arritje” që mund të evidentohet në këto tre muaj është emërimi në post drejtori i shefit të Shtabit zgjedhor, njëherësh dhëndër i tij, Besim Koka. Ky veprim është dëshmi e qartë se prioriteti i Izet Mexhiti nuk janë qytetarët, por nepotizmi dhe interesat e ngushta personale", thonë nga BDI.