Kërçova është zgjuar sot nën petkun e bardhë të dëborës, e cila ka rënë gjatë orëve të natës, duke krijuar një shtresë të konsiderueshme bore në qytet dhe rrethinë.
Si pasojë e reshjeve, janë paraqitur vështirësi në lëvizjen e automjeteve dhe këmbësorëve. Kryetari i Komunës së Kërçovës, Aleksandar Jovanovski, ka deklaruar se ekipet e Ndërmarrjes Publike “Komunalec” janë në terren dhe po punojnë intensivisht për pastrimin e rrugëve urbane nga dëbora. Ndërsa për vendbanimet rurale, thotë ai,komuna ka kontraktuar kompani private për pastrimin e borës dhe mbajtjen e rrugëve të kalueshme.

Deri në këto momente, nuk janë raportuar probleme me furnizimin me energji elektrike apo vështirësi të tjera serioze, përveç ngadalësimit dhe vështirësimit të qarkullimit të automjeteve dhe këmbësorëve.
Nga Lidhja Auto-Moto e Maqedonisë, si dhe nga Qendra për Menaxhim me Kriza (QMK), u bëhet thirrje qytetarëve për kujdes të shtuar gjatë qarkullimit, veçanërisht në vendkalimet malore, si dhe respektimin e rekomandimeve për vozitje në kushte dimërore.