​​​​​Kryeministri Edi Rama ka publikuar një video në rrjetet sociale, ku foli për kërkesën e gjyqtarëve për rritjen e pagave të tyre, për të cilat tha se janë po aq sa në Greqi, madje dyfish me pagat në dy vendet e tjera fqinje, Maqedoninë e Veriut dhe Malin e Zi.

“Për ta patur të qartë se sa është niveli i pagave në Shqipëri, dua që ta dinë të gjithë se e vërteta është që në Shqipëri, pagat e gjykatësve sot siç janë, janë të njëjta me pagat e gjykatësve në Greqi, në një vend të BE-së dhe ndërkohë janë dyfish më të larta sot siç janë se sa pagat e gjyqtarëve në Maqedoni dhe në Malin e Zi.”, deklaroi kryeministri.

Në këtë videomesazh, kryeministri Rama duke komentuar kërkesën e gjyqtarëve në Shqipëri, shprehet se ata e kërkuan tinëzisht rritjen e pagave të tyre. Madje shtoi se ballafaqimi i magjistratëve në Gjykatën Kushtetuese linte shumë për të dëshiruar.

“Gjykata Kushtetuese publikoi përpara pak ditësh, regjistrimin e seancës ku gjykatësit, dy shoqata gjykatësish, edhe ata me probleme ligjore të paregjistruara, gjithsesi, kërkuan nga Gjykata Kushtetuese që t’ju rrisë pagat. Tani, po ta dëgjosh atë regjistrim të publikuar nga Gjykata Kushtetuese të seancës, realisht ndihesh në vështirësi. Ndihesh në vështirësi të madhe, duke menduar që këta janë njerëzit që gjykojnë dhe japin drejtësi, ndërkohë që filli i logjikës së atyre që u ballafaquan me gjykatën kushtetuese, lë tejet, tejet, tejet për të dëshiruar. Dhe këtu nuk është çështje personash dhe unë nuk kam asnjë qëllim dhe asnjë dëshirë të bëj asnjë polemikë me askënd, por ja si flet njëri syresh për shembull: Unë jam gjyqtar karriere, thotë përveçse qytetar aktiv në shoqëri dhe kuptoj nga jeta politike, kuptoj nga jeta shoqërore dhe kuptoj nga të gjitha.

Dhe vazhdon ‘nga ana e kryeministrit dhe e gjithë pjesës tjetër, u anatemua’. Domethënë u anatemua ideja që këta njerëz mund të përdorin pushtetin e tyre për të shkelur mbi qeverinë, mbi parlamentin, mbi dy pushtetet e tjera dhe për t’i rritur pagat vetes. ‘Mendova këtë gjë – thotë, që edhe ne të zgjuar jemi. Të presim një moment të përshtatshëm kur përgatiteshin zgjedhjet e tjera që ishin dhe të paktën qeveria nuk do kishte kohë të merrej me ne apo me ju, dhe ndërkohë nuk i dihet si dilte rezultati i zgjedhjeve dhe kjo është ‘mot a mot’ ‘E kam paraqitur në fillim të marsit, e kam bërë kërkesën vetë personalisht’- thotë ky zotëria, e kam sjellë dhe kam shpresuar se do të dilte shumë shpejt kërkesa qe të mos kishte kohë që të merrej të paktën me presionin ..’ Domethënë ky i thotë gjykatës që ‘thashë ta bëjmë kështu tinëz këtë punë, pa e pasur mendjen të tjerët dhe qeveria kishte zgjedhjet, dhe s’e kishte mendjen tek ne dhe me këtë rast t’i merrnim buxhetit të shtetit, t’i merrnim shqiptarëve nga taksat 37 milionë euro. Aq është shuma. 37 milionë euro të tjera., ‘Sepse gjyqi është gjyq në fund të fundit dhe ne nuk duam interesin tonë- thotë. Gjyqtari sot është, nesër nuk është –thotë, kur vjen puna jonë”, tha Rama.

Kreu i qeverisë ironizon argumentimin e gjyqtarëve duke thënë se po të zbatohet i njëjti parim që kërkojnë ata për të gjithë, i bie që edhe tatimorëve t’u rriten pagat për shkak të të ardhurave që sigurojnë për shtetin, por jo mësuesve të cilët ndonëse nuk prodhojnë para, kontribuojnë në një tjetër mënyrë të rëndësishme për të ardhmen e shoqërisë.

Rama shton se shpreson që Gjykata Kushtetuese nuk do t’i lërë njollë turpi Shqipërisë, lidhur me këtë kërkesë të gjyqtarëve për rritje pagash.

“Gjykatësit duan të imponohen mbi Parlamentin, mbi qeverinë dhe mbi dy pushtetet e tjera dhe të marrin rroga sipas mendimit të tyre. E fundit dhe do e mbyll këtu, një tjetër thotë: Pse nuk kihet parasysh se ne bëjmë edhe lekë. Ne i sjellim para buxhetit të shtetit para, ndaj me ato para të na rritet paga. Kjo është një tjetër çudi shumë e madhe. Se thotë ne kërkojmë disa të ardhura, ne prodhojmë të ardhura. Dhe kjo diferenca 37 milionë, pra kërkon 37 milionë plus nga taksat dhe thotë se kjo mbulohet vetëm nga ajo që i kthejmë ne buxhetit të shtetit. Nuk është ndonjë dëm thotë, se kjo është një parashikim, por po të përdoren të gjithë çfarë vjen nga paditë do ishin më shumë.

Pra sipas asaj që thonë gjyqtarët, edhe tatimorët që i sjellin shumë të ardhura buxhetit, pse mos t’i kenë pagat shumë më të larta se të tjerët. Por edhe Policia pse mos t’i marrë gjithë gjobat për vete. Po mirë mor, po mësuesit që nuk i sjellin të ardhura të drejtpërdrejta siç thotë zotrote, si i bëhet, po pensionistët, si i bëhet? 37 milionë euro i doni ju për t’i çuar pagat në stratosferë, për t’i bërë pagat shumë herë më të larta se në Greqi e në shumë vende të tjera të BE-së, ndërkohë që këtu ka plot njerëz të tjerë që kontribuojnë, që nuk prodhojnë të ardhura të tilla nga gjobat e konfiskimet, por prodhojnë shumë gjëra të tjera në shoqëri, këtyre si do t’u rritet paga?

Shpresoj shumë që Gykata Kushtetuese të mos ia lërë këtë njollë të madhe turpi Shqipërisë e të mos na bëjë të marrim ilaçe të tjera. Dhe do kuptojë shumë mirë se sa absurde është kjo histori me gjykatësit që duan ti rrisin vetes pagat, vetë Zot dhe vetë shkop.”, tha Rama.

Çështja e pagave të gjyqtarëve është bërë objekt debati prej disa vitesh, sidomos pas Reformës në Drejtësi, e cila solli rritje të ndjeshme të trajtimit financiar për trupën gjyqësore dhe prokurorët, me synim forcimin e pavarësisë dhe integritetit të sistemit.

Dy shoqata të gjyqtarëve i janë drejtuar Gjykatës Kushtetuese duke kërkuar që pagat e tyre të indeksimit automatikisht sa herë rriten pagat në sektorë të tjerë shtetërorë, duke e konsideruar këtë si garanci kushtetuese të pavarësisë së gjyqësorit. Në datë 20 janar, në Gjykatën Kushtetuese u mbajt seanca lidhur me kërkesën e dy shoqatave.