Presidenti i Ukrainës, Volodymyr Zelensky, ka akuzuar Rusinë se ka shkelur një marrëveshje armëpushimi të ndërmjetësuar nga presidenti amerikan Donald Trump, sipas së cilës Moska ishte zotuar të përmbahej nga sulmet ndaj infrastrukturës energjetike të Ukrainës gjatë një periudhe me temperatura ekstreme.

Akuzat vijnë pasi forcat ruse kryen sulme ajrore në shkallë të gjerë ndaj Kievit gjatë natës, në prag të bisedimeve trepalëshe mes Rusisë, Ukrainës dhe Shteteve të Bashkuara, që pritet të zhvillohen këtë javë në Abu Dhabi.

Sipas Zelensky-t, sulmi ishte “masiv dhe i qëllimshëm” dhe u krye në një moment kur temperaturat në kryeqytet ranë deri në -20 gradë Celsius. Ai deklaroi se Rusia përdori një numër rekord prej 71 raketash balistike dhe rreth 450 dronë, me synim shkatërrimin e infrastrukturës energjetike. Si pasojë e sulmeve, më shumë se 1,000 ndërtesa banimi në Kiev mbetën pa ngrohje.

Presidenti ukrainas tha se sulmi përbën shkelje të drejtpërdrejtë të një premtimi që, sipas tij, ishte bërë pas një kërkese personale të Donald Trump drejtuar presidentit rus Vladimir Putin për të ndalur sulmet në Kiev dhe në qytete të tjera për një javë, për shkak të të ftohtit ekstrem.

“Ai pranoi ta bënte këtë. Dhe duhet t’ju them se ishte shumë bukur”, tha Trump.

Zelensky shtoi se Rusia e kishte shfrytëzuar këtë pauzë të shkurtër për të grumbulluar armë.

“Ose Rusia beson se një javë ka vetëm katër ditë dhe jo shtatë, ose ata po vënë bast vetëm për luftë dhe po presin ditët më të ftohta të këtij dimri. Ne besojmë se ky sulm rus shkel qartë atë që pala amerikane ka diskutuar dhe duhet të ketë pasoja”, theksoi Zelensky.

Ndërkohë, një raund i dytë bisedimesh mes Rusisë, Ukrainës dhe SHBA-së për përfundimin e luftës pritet të zhvillohet të mërkurën dhe të enjten në Abu Dhabi.

/rtsh.al/