Kryeministri Edi Rama iu përgjigj paraditen e sotme Shoqatës së Gjyqtarëve edhe lidhur me një pretendim të tyre se gjyqtarët që nuk kishin kaluar ende vettingun, do të paguheshin me pagat e vitit 2008.

Sipas kreut të Qeverisë, Shoqata kërkoi rritje pagash edhe për ata gjyqtarë që procesi i verifikimit të figurës i nxori nga sistemi pasi kishin pasur pasuri të pajustifikuara.

“Ju thoni “së treti paketa iu pasua keq besimit të tretë pasi në momentin e fundit në Kuvend u ndryshua dispozita tranzitore e ligjit duke u parashikuar që magjistratët që nuk kishin kaluar vettingun në datën”, – e shumë dhe mezi pritur, shqipja, “1.1.2019 do vijonin të merrni pagën e vjetër, atë të përcaktuar në vitin 2008”. Pra që ta dëgjojë publiku, ju keni shkuar në Gjykatën Kushtetuese për t’ju rritur pagën atyre që iu hoqi vettingu sepse nuk ishin të denjë për sistemin e ri të drejtësisë.  Ju keni shkuar në Gjykatën Kushtetuese për t’i kërkuar taksapaguesve shqiptarë që të paguajnë paga më të larta se të të gjithë të tjerëve, për gjykatës dhe prokurorë sepse Vetingu i hoqi sepse kishin pasur të pajustifikuara”, deklaroi Rama.

Duke iu referuar qëndrimit të Shoqatës së Gjyqtarëve të një dite më parë, kreu i qeverisë tha se këta të fundit mendojnë se edhe gjyqtarët e korruptuar dhe “gjakpirësit e sistemit të drejtësisë dhe të popullit shqiptar”, siç i quajti ai, meritojnë rritje pagash.

“Si mund ta fusni dhe këtë në radhën e pretendimeve që keni nga kjo “qeveri e poshtër” e cila ka bërë një reformë historike dhe e cila ka bërë atë që kolegët tuaj nga viti 2012 dhe deri kur u bë kjo reformë, do ta kishin ëndërruar, por nuk e kanë prekur dot; ia ka dhënë pavarësinë pushtetit, që juve sot duhet të bëni çdo gjë që ta ushtroni me dinjitet; pushtetin që juve sot duhet të bëni çdo gjë që ta ktheni në një të mirë të madhe të popullit shqiptar; pushtetit që juve sot duhet të bëni çdo gjë për t’iu dhënë shqiptarëve pavarësisht statusit social, pavarësisht çfarëdolloj diference që kanë në jetën e përditshme, atë që shqiptarët e kanë ëndërruar por s’e kanë pasur kurrë dhe nuk e kanë akoma edhe sot dhe për këtë duhet ju, të jeni të parët që të shqetësoheni, barazinë para ligjit”.