Ministri i Shëndetësisë, Azir Aliu, njoftoi sot se kanë filluar kontrollet e të gjitha kompanive që prodhojnë kanabis mjekësor. Aliu tha se do të duhet të kontrollohen mbi 40 licenca, ndërsa tha se për momentin ekzistojnë dy komisione që kontrollojnë punën e kompanive. Aliu informoi se ka kërkuar ndryshime ligjore që do t’i lejonin ministrit në raste të tilla të kishte autoritetin për të krijuar më shumë se një komision.

“Kontrollet e jashtëzakonshme nisin prej sot. E dini se 43 licenca duhet të kontrollohen dhe institucionet që prodhojnë kanabis për qëllime mjekësore. Pardje në seancë të qeverisë u soll vendim për emërimin e anëtarëve në komisionin ndërdikasterial. Udhëheqës me atë komision do të jetë një person nga Ministria e Shëndetësisë. Për fat të keq ky komision është formuar në vitin 2017 dhe ne nuk kemi gjetur asgjë raport mbi punën e tij, edhe pse ajo është ndër komisionet kyçe për mos të ndodhë ajo që na ndodhi. Do të kërkojmë dinamikë çdo muaj nga ai komision”, deklaroi Azir Aliu, Ministër i Shëndetësisë. /Alsat.mk