Presidenti i SHBA-së, Donald Trump, e ka cilësuar Kubën si një “shtet të dështuar” dhe i bëri thirrje Havanës zyrtare të arrijë një marrëveshje me Shtetet e Bashkuara të Amerikës, megjithëse hodhi poshtë mundësinë e një operacioni amerikan për të përmbysur qeverinë kubaneze.

“Kuba është një shtet i dështuar tani”, u tha Trump gazetarëve në aeroplanin e tij "Air Force One'.

Në të njëjtën kohë, ai shtoi më tej se SHBA-ja po flet me Kubën, duke shpjeguar se Sekretari Amerikan i Shtetit, Marco Rubio, ka marrë përsipër bisedimet.

“Ata duhet patjetër të bëjnë një marrëveshje. Do të shohim si do të shkojë. Por ne dhe Kuba po flasim. Ndërkohë, nuk ka naftë, nuk ka para”, tha Trump.

Kuba po përballet me mungesa të mëdha karburanti dhe ndërprerje të energjisë elektrike, ndërsa administrata Trump ka shtrënguar embargon e saj dekadëshe ndaj vendit dhe ka ushtruar presion mbi vendet e tjera që të mos dërgojnë naftë në Havanë. Duke iu referuar mungesave të karburantit, presidenti amerikan pranoi se ato përbëjnë një kërcënim humanitar. /CNA