Futbollisti shqiptar Ernest Muçi vazhdon të shkëlqejë në kampionatin turk. Mesfushori ofensiv është shpallur “Lojtari i Muajit” në Turqi nga HT Spor, pas paraqitjeve mbresëlënëse me fanellën e Trabzonspor.
Që prej transferimit të tij në Trabzon, 23-vjeçari ka qenë në formë fantastike, duke u kthyer shpejt në një nga pikat kyçe të skuadrës. Me 13 gola në 29 ndeshje, dhe një ndikim të dukshëm në lojën sulmuese, Muçi ka fituar besimin e stafit teknik dhe duartrokitjet e tifozëve.
Paraqitjet e tij të fundit kanë ardhur në momente të rëndësishme për Trabzonsporin, duke ndihmuar ekipin në garën për objektivat sezonalë. Vlerësimi si Lojtari i Muajit konfirmon rritjen e vazhdueshme të talentit shqiptar, i cili po tregon pjekuri dhe cilësi në një kampionat konkurrues si Superliga turke.
Forma e Muçit është gjithashtu një sinjal pozitiv për Kombëtaren shqiptare, teksa me shumë mundësi ai do të jetë në skuadër për ndeshjen e Play Off ndaj Polonisë.
