Shtëpia prestigjioze e bizhuterive Bvlgari ka mirëpritur zyrtarisht këngëtaren me famë botërore Dua Lipa si ambasadoren e saj më të re globale.

Në njoftimin e publikuar, artistja shprehu entuziazmin për bashkëpunimin me markën ikonike italiane, duke e cilësuar si një moment të veçantë në karrierën e saj.

“Është jashtëzakonisht e veçantë të punoj përkrah një marke ikonike si Bvlgari dhe jam e emocionuar të jem pjesë e një shtëpie që mishëron vetëbesimin, kreativitetin dhe feminitetin modern. Pjesët e tyre janë gjithmonë prekja e fundit perfekte, duke e kthyer një paraqitje në një moment të vërtetë”, është shprehur Dua Lipa.

Ky bashkëpunim shënon një kapitull të ri për artisten, e cila vazhdon të forcojë pozicionin e saj jo vetëm në industrinë muzikore, por edhe në botën e modës dhe luksit ndërkombëtar. /KultPlus.com