Komuna e Strugës informon se më 16 të këtij muaji do të mbahet një ankand për shitjen e automjetit Audi A6, me çmim fillestar prej 1.344.636 denarësh, ose rreth 21.800 euro, përcjell TV21. Sipas njoftimit të shërbimit për media të komunës, ankandi do të fillojë në orën 10:00 në faqen e internetit e-stvari.mk.

“Me të ardhurat nga shitja e automjetit do të blitet një furgon që do të shërbejë për nevojat e administratës komunale dhe klubeve sportive në qytet”, thuhet në informacion.

Komuna njofton se njoftimi nr. 1/2026 për shitjen e sendeve të lëvizshme – automjetit, përmes ankandit elektronik, është publikuar edhe në Gazetën Zyrtare.

“Ftojmë të gjitha palët e interesuara të marrin pjesë në ankand. Në ankand do të publikohen të gjitha informacionet për automjetin, si dhe udhëzimet për aplikim”, informon Komuna e Strugës

Automjeti, Audi A6, i cili u ble nga Komuna e Strugës për 67.000 euro, gjatë kohës kur kryetar i komunës ishte Ramiz Merko, kishte shkaktuar debat në opinion për shkak se ishte blerë në periudhën kur komuna kishte llogari të bllokuar. Kundër Merkos ishte zhvilluar një proces gjyqësor, në të cilin gjykata në Strugë vendosi se nuk ka faj për blerjen e automjetit luksoz.