Kryetarja e Forumit të Grave të LSDM-së, Kaja Shukova, në konferencën e sotme për media kërkoi përgjegjësi nga ministri i Punëve të Brendshme, Pançe Toshkovski, pas një serie tragjedish të lidhura me dhunën në familje dhe dështimet institucionale, transmeton Portalb.mk.

“Edhe sa jetë duhet të shuhen për të pasur përgjegjësi? Edhe sa tragjedi duhet të ndodhin që Pançe Toshkovski të japë dorëheqje?”, deklaroi Shukova.

Ajo theksoi se opinioni publik është në zi, shok dhe zemërim pas tragjedisë së fundit në lagjen Karposh të Shkupit, ku humbën jetën një nënë dhe vajza e saj e mitur.

“MPB-ja e Pançe Toshkovskit nuk i mbrojti ato. Kishte 12 denoncime në dy vjet për dhunë familjare, fizike dhe psikologjike ndaj të resë Ivana”, tha Shukova, duke pyetur se sa gra raportojnë dhunë në familje ndërsa institucionet nuk reagojnë me kohë dhe në mënyrë të duhur.

Shukova u ndal edhe te raste të tjera që kanë tronditur opinionin. Ajo përmendi se në Veles një dhunues serial mori dy jetë – të së resë Rosica dhe të babait të saj, ndërsa prej gjashtë muajsh zhvillohet një hetim paraprak për të përcaktuar nëse 11 policë kanë vepruar siç duhet.

“Në rajonin e Kumanovës, në Staro Nagoriçane, një vrasës serial mori pesë jetë grash. Për dy vjet janë injoruar denoncimet e banorëve. Sërish dështim i MPB-së”, tha Shukova.

Ajo kujtoi edhe tragjedinë në Koçan, ku humbën jetën 64 persona, duke vlerësuar se ministri po përpiqet të shmangë përgjegjësinë.

“Ai bën gjithçka për ta larguar përgjegjësinë nga vetja. Organizon tubime me tregime boshe se do të mbrojë 24 orë. I thërret institucionet, ndërkohë që ai vetë drejton një institucion. Gjithçka është propagandë, askund nuk ka përgjegjësi”, deklaroi Shukova.

Në prag të Ditës Ndërkombëtare të Gruas – 8 Marsit, ajo bëri thirrje për reagim të fortë kundër dhunës dhe dështimeve institucionale.

Forumi i Grave i LSDM-së paralajmëroi një marsh protestues në Bogdancë që do të fillojë në orën 12:00, duke shprehur njëkohësisht mbështetje edhe për marshin qytetar në Shkup.