Në Kërçovë u prezantua programi i studimeve të disperzuara të Fakultetit Teknologjik-Teknik nga Velesi, që funksionon në kuadër të Universitetit “Shën Klimenti i Ohrit” -Manastir. Ky program synon t’u ofrojë të rinjve nga rajoni mundësi për të studiuar më afër vendbanimit të tyre dhe për të fituar njohuri profesionale në fushën e teknologjisë dhe industrisë ushqimore.
Dekanja e fakultetit, Vezirka Jankuloska, theksoi se studentët që do të regjistrohen në studimet e disperzuara në Kërçovë do të kenë në dispozicion kushte bashkëkohore për mësim dhe punë praktike. Ajo nënvizoi se programet studimore janë të përgatitura në përputhje me nevojat e tregut të punës dhe ofrojnë kombinim të njohurive teorike dhe praktike.
Sipas saj, fakulteti ofron laboratorë, pajisje moderne dhe staf akademik të kualifikuar, të cilët i ndihmojnë studentët të fitojnë kompetencat e nevojshme për t’u përfshirë në sektorë të ndryshëm të industrisë.
Jankuloska shtoi se pas diplomimit, studentët kanë mundësi të shumta për punësim, veçanërisht në industrinë ushqimore, në kompani prodhuese, laboratorë kontrolli të cilësisë, si dhe në institucione të ndryshme publike dhe private që lidhen me teknologjinë dhe prodhimin.
Hapja e këtyre studimeve   në Kërçovë konsiderohet një mundësi e rëndësishme për të rinjtë e rajonit, pasi u jep mundësi të ndjekin studimet universitare pa pasur nevojë të largohen nga qyteti, duke kontribuar njëkohësisht edhe në zhvillimin profesional të kuadrove të reja në këtë fushë.